Brjálaður Anarkisti

Ég var að komast að einu um sjálfan mig: ég er hættur að horfa á sjónvarp. Samt er þetta ekki eins og hjá sumum kunningjum mínum, að ég sé farinn að horfa á kvikmyndir og sjónvarpsþætti á tölvunni sem ég hleð niður af netinu. Nei, ég er alfarið hættur að horfa á eitt eða neitt. Ég hlusta á tónlist, spila á gítar, hljómborð eða munnhörpu, les greinar, bækur, fréttir og hvaðeina annað af netinu og svo spjalla við fólk á IRC og MSN, aðallega þó IRC, þar sem þar getur maður hitt fólk sem maður þekkti ekki áður og spjallað við ótal manns samtímis.

Eins og ég minntist á í fyrri færslu, þá var ég að sjá Orkuveituauglýsinguna. Ég hafði heyrt fólk tala um hana og séð ótal marga minnast á hana, en hafði aldrei séð hana sjálfur. Ég þurfti að fara á vef OR til að sjá hana.

Ég fer heldur ekki mikið í bíó, ég hætti að mestu að fara í bíó fyrir uþb 15 árum síðan. Mér finnst það of mikið vesen. Mér finnst ég ekki missa af neinu að sjá myndir af 10 tommu skjá 5 metra í burtu. Konan mín minnti mig á það um daginn að ég hef bara einu sinni farið með henni í bíó. Þó hef ég farið oftar með yngri dóttur minni, eða 3 eða 4 sinnum.

Ég held stundum að ef ég hefði verið uppi á umbrotatímum kirkjunnar hefði ég gerst myndabrjótur. Yfirleitt finnst mér eitt orð segja meira en þúsund myndir.

Þessi grein var skrifuð miðvikudaginn 28. júní 2006 klukkan 1:07. Hægt er að fylgjast með umræðunum gegnum RSS 2.0 veitu. You can leave a response, or trackback from your own site.