Að gefnu tilefni hef ég tekið upp nýja ritstjórnarstefnu: hér verður ekki framar hægt að minnast á ýmis vinsæl stinningarlyf, róandi lyf eða kvalastillandi. Öllum slíkum athugasemdum verður sjálfkrafa eytt.
Ég ætla ekki að láta netlyfsala og aðra stórglæpamenn misnota þennan vef til að googlebomba sitt skran.
Í dag er Kerfisstjóradagurinn, sjá www.sysadminday.com
Ég hef heyrt að sumir telji vöruúrval hafa farið vaxandi síðan Baugsveldið yfirtók smásölu á Íslandi. Það er bæði rétt og rangt. Það er ótrúlega mikið úrval af afbrigðum af einum og sama hlutnum, en vantar svo heilu yfirflokkana af öðru. Til dæmis er hægt að fá tæplega 20 mismunandi afbrigði af Dijon-sinnepi (sem mér finnst með of miklu edikbragði), auk nokkurra algengra amerískra og danskra tegunda, að ógleymdu hinu íslenska. Hins vegar er ekki hægt að fá sinnep af vissri tegund sem kallast enskt sinnep, en umsvifamesti framleiðandi þess er Colman’s.
Það er merkileg þversögn með Englendinga að þeir eru ámóta kryddfælnir og Íslendingar, en framleiða þó sterkasta sinnep sem til er. Enskt sinnep er lagað án ediks og er ámóta sterkt og japanska maukið wasabe sem er haft með sushi og sashimi. Þegar það snertir öftustu bragðlaukana fær maður fullnægingu í ennisholurnar.
Því var það mér sérlega ánægjulegt þegar systir mín kom frá Englandi í fyrrinótt eftir tæplega tveggja ára fjarveru og kom með dollu handa mér.
Ég man líka eftir að hafa séð Colman’s sinnep auglýst í Morgunblaðinu frá því árið nítjánhundruð-þrjátíu-og-eitthvað.
Það sem ég vil fá að vita er þetta: ætlar ríkisstjórnin að gera eitthvað í því að tryggja anglófílum þessa lands jafn-sjálfsögð mannréttindi og áframhaldandi aðgengi að ensku sinnepi?
Ég held ég fari út að hjóla og kannski slappa af á Austurvelli
Hvers vegna er þessi maður að syngja og spila opinberlega?
Árni Johnsen er gersamlega vitalaglaus og gæti ekki haldið lagi þótt líf hans lægi við. Það er vísindaleg staðreynd. Hvað gítarleikinn snertir, þá veit ég dæmi um að fullorðið fólk hafi náð margfalt meiri færni á tveimur vikum án þess þó að hafa snert á hljóðfæri áður á æfinni.
Hann er verri en Björgvin Halldórsson. Að minnsta kosti var Björgvin farinn að halda lagi eftir um það bil 10 ár í sviðsljósinu. Eða hvað veit ég, kannski hefur upptökutækninni bara fleygt svona fram.
Getur einhver sagt mér hvers vegna kaninka.net svarar ekki? Er bara búið að slökkva á henni rétt sisona? Hún datt út um hádegisbilið í gær og er ennþá úti.
Mér líður mikið betur. Núna er ég næstum farinn að geta snert tærnar með lófunum aftur. Ég þakka meðal annars æfingum sem ég þróaði þegar ég var sem verstur á miðvikudaginn. Ég býst við að geta farið að krækja saman fótunum bak við hnakka aftur fljótlega.