Brjálaður Anarkisti

Njósnari minn í Valhöll segist hafa orðið vitni að eftirfarandi í gær:

Hvítserkjuð hersing gengur inn í hátíðarsal, hvítar topphúfur skína; blá augu gægjast gegnum andlitsgrímur. Þeir raða sér stillt og hátíðlega í hálfhring kringum mannsmynd í miðju salarins. Árni Johnsen (því það er hann) lítur upp á hina blessuðu hersveit, ásjóna hans er upplýst og yfir henni er goðumlík ró.

Björn Bjarnason mælir fyrstur: Hér höfum við auman mann, iðrandi syndara er beiðist inngöngu í samfélag heilagra.

Kór: Er hann verðugur?

Björn Bjarnason: Hann er hinn Drottins Smurði.

Kór: Svo skal vera. Dýrð sé Davíð í upphæðum.

Rödd að ofan (hljómar samt nákvæmlega eins og Geir Haarde að herma eftir Davíð Oddssyni): Hann er minn elskaði sonur, sá er ég hef velþóknun á.

Kór: Hallelúja!

Geir Haarde: Það skal svo vera. Rís upp, sonur vor og meðtak blessun vora.

Kór: Hann er innmúraður.

Meira veit heimildamaður minn ekki, því þrír drengir í stuttbuxum komu honum að óvörum og skutu hann með deyfipílum og vaknaði hann með höfuðverk dauðans í tattústofu í austurborginni.

Þá þótti mér ég fara að gráta og þá vaknaði ég.

Ég man ekki nákvæmlega hvenær, en það var þegar það kólnaði. Sama dag  tók ég eftir því að lauf á birkitrénu í bakgarðinum mínum eru orðin gul.

Ég held að þetta hafi verið fyrir viku síðan.

Sú nýlunda er komin á í íslensku stjórnkerfi að ný lög eru ekki gefin út á prenti af Alþingi heldur eru þau tilkynnt af dómsmálaráðherra á Rótarýfundi.

En út í aðra sálma.

Finnst einhverjum sem hæstvirtur dómsmálaráðherra skilji muninn á “leyniþjónustu” og “leynilögreglu” og ætli það sé hægt að útskýra það fyrir honum?

Trúarhneigð, sem oft sprettur út í trúarfíkn og jafnvel trúaræði, er sennilega læknanleg.

Þetta eru góðar fréttir fyrir þá sem þjást af þessari öfughneigð, t.d. Snorra í Betel og Gunnar í Krossinum.

Ég fór á kertafleytingu í tilefni af Hírósjíma og lét mig hafa það að kaupa kerti úr jarðolíuafurðum til að henda út í aumingja Tjörnina. Af hverju ekki tólgarkerti? hugsaði ég. Lífræn og niðurbrjótanleg náttúruafurð og einnig fæða fyrir fuglana.

Ég hef verið að hugsa að ég er kannski ekki svo mikill friðarsinni eftir allt. Ég er bara andsnúinn utanríkisstefnu Bandaríkjanna og tel að ef við þurfum að verjast einhverjum, þá er það einmitt þeim.