Brjálaður Anarkisti

Þetta hafa verið gleðileg jól hjá mér og ég vona að þau hafi verið það hjá ykkur öllum hinum. Íbúðin venst ótrúlega vel og nú finnst mér eins og ég hafi alltaf búið þarna. Ég stefni á stórhreingerningu nú á eftir þegar þessi pistill hefur verið skrifaður, enda hef ég bara sóðað til síðan innflutningspartíið gekk yfir.

Í gær fór ég í mat til mömmu. Allir komu með eitthvað og ég kom með 32 litlar skálar af möndlubúðingnum mínum. Kvöldið áður var ég í mat hjá Önnu systur minni og Kjartani manni hennar. Ég kom síðan við hjá móður Erlu og labbaði með Erlu og Skarpa á nýja staðinn þeirra og tók þar jólagjöfina mína. Eftir það fór ég heim og lagaði möndlubúðinginn og sósuna, en það tók mig heila sex tíma samfleytt.

Ég fékk óboðinn gest í morgun. Hann hefur eflaust oft komið áður, enda hef ég heyrt í honum, og svo sá ég hann líka fara í gær. Það var sem sagt köttur sem labbaði inn um baðherbergisgluggann, en þangað virðist hann hafa trítlað langa leið utan á húsinu. Svo skemmtilega vildi til að Brynhildur dóttir mín var fyrst til að sjá hann innandyra.

Nágranni minn bankaði upp á. Hann er að fara að selja íbúðina sína, sem er beint á móti minni og er nákvæmlega eins nema bara spegilmynd, með flottara baði en ekki eins flottu eldhúsi, viðarparketi á gólfum. Gamalt píanó sem þarfnast stillingar fylgir.

Ég gerði gríðarlega margt í gær. Ekkert af því var vegna jólanna. Ég lít samt á það sem æfingu fyrir harðaspanið á Þorláksmessu.

Ef ég verð ekki fyrir loftsteini eða dett skyndilega niður með hjartaáfall mun ég verða íbúðareigandi á morgun. Ég er reyndar íbúðareigandi fyrir, en ég get eiginlega ekki búið þar lengur, af ástæðum sem ættu að vera orðnar kunnar lesendum þessarar síðu.

Ég leiddist líka út í það glapræði að kaupa áður en ég sel. Það versta sem getur gerst er að ég verð þræll bankakerfisins til æfiloka, s.s. það mun engin breyting verða á mínum högum frá því sem orðið er.

Ég held að ég ætti að fara út í stærri hluti. Kannski ætti ég að biðja bankann um að fjármagna kaup á t.d. Time-Warner eða Universal Studios eða einhverju þannig?

22, 22, 22

Ég var að skrifa undir gagn-gagn-gagntilboð í dag. Ég var sum sé að festa kaup á íbúð og fæ hana afhenta við undirritun kaupsamnings, sem á að verða ekki síðar en 22. desember. Hún er að Mánagötu, ekki mjög langt frá Þórdísi og bara í næsta húsi við Stefán. Ég  legg til að nafni þessa hverfis verði breytt og hún kölluð Bloggmýri.