Ættfræði
Tóta pönk var að birta einhverjar samanrakningar af Íslendingabók. Ég nenni varla að standa í svoleiðis þótt að við Davíð Oddsson séum fjórmenningar. Annars finnst mér merkilegt að móðurafi minn og móðuramma eru bæði komin af sömu konu í beinan kvenlegg, og það finnst mér líka mjög merkilegur kvenleggur.
Hér er beinn kvenleggur ömmu í 10 ættliði:
| Ingibjörg Einarsdóttir Vestmann | 1919 - 1988 |
| Guðríður Nikulásdóttir | 1891 - 1929 |
| Helga Guðmundsdóttir | 1866 - 1916 |
| Anna Margrét Bjarnadóttir | 1843 - 1869 |
| Helga Ólafsdóttir Stephensen | 1818 - 1900 |
| Anna Stefánsdóttir Scheving | 1792 - 1865 |
| Helga Jónsdóttir | 1765 - 1838 |
| Þórunn Hansdóttir Scheving | 1727 - 1795 |
| Guðrún Vigfúsdóttir | 1701 - 1767 |
| Helga Jónsdóttir | 1670 - 1743 |
| Guðríður Þórðardóttir | 1645 - 1707 |
Hér er beinn kvenleggur afa míns í 9 ættliði:
| Stefán Bjarnason | 1910 - |
| Guðný Guðnadóttir | 1872 - 1933 |
| Guðrún Vigfúsdóttir Thorarensen | 1842 - 1918 |
| Ragnheiður Melsteð Thorarensen | 1816 - 1914 |
| Anna Sigríður Stefánsdóttir Thorarensen | 1790 - 1844 |
| Ragnheiður Vigfúsdóttir Scheving | 1763 - 1843 |
| Anna Stefánsdóttir | 1729 - 1820 |
| Ragnheiður Magnúsdóttir | 1699 - 1738 |
| Sigríður “eldri” Jónsdóttir | 1669 - 1725 |
| Guðríður Þórðardóttir | 1645 - 1707 |
Beinn kvenleggur beggja kemur saman í Guðríði Þórðardóttur, biskupsfrú á Hólum, en maður hennar, Jón “yngri” Vigfússon, auknefndur “Bauka-Jón” var fyrsti eiturlyfjasali Íslands, sýslumaður og síðan Hólabiskup. Hann var líka ein helsta persóna Íslandsklukku Laxnesss, bæði sem sýslumaður, biskup og sem faðir helstu kvenpersónunnar.
Ég ætla ekki að fara meira út í þá staðreynd að sömu ættarnöfnin birtast í fleiri kynslóðir í röð. Við skulum láta okkur nægja að segja að afkomendur Guðríðar og Jóns vildu helst ekki giftast öðru fólki en öðrum afkomendum Guðríðar og Jóns, nema ef vera skyldi afkomendum Stefáns frá Vallanesi (1619 - 1688) og konu hans, enda er hægt að rekja ættir ömmu minnar og afa til þessa fólks á mjög marga vegu.
Hér er beinn kvenleggur Guðríðar:
| Guðríður Þórðardóttir | 1645 - 1707 |
| Helga Árnadóttir | 1626 - 1693 |
| Þórdís Jónsdóttir | 1600 - 1670 |
| Sigríður “yngri” Þorgrímsdóttir | 1560 - 1607 |
| Þórdís Jónsdóttir | 1525 - ? |
| Ragnheiður “á rauðum sokkum” Pétursdóttir | 1494 - 1540 |
| Sigríður Þorsteinsdóttir | 1464 - 1525 |
| Ragnheiður Eiríksdóttir | 1440 - ? |
Þessi nöfn eru ekki vel þekkt í Íslandssögunni, en nöfn eiginmanna þeirra eru hins vegar vel þekkt. Samt áttu þær sjálfar merkilega ævi á margan hátt, og að minnsta kosti ein þeirra varð mjög sterkur örlagavaldur í sögu lands og þjóðar.
15. mars 2007 klukkan 14:19
Ja hérna, ég fann út að þú ert skyldari mér en flestir þeir sem mér hefur hugkvæmst að fletta upp í Íslendingabók. Þið föðurafi minn eruð fjórmenningar. Við erum víst komin af þeim Halldóri Guðmundssyni og Margréti Þorbergsdóttur, ábúendum á Meirahrauni (sem mér finnst dálítið smart bæjarnafn).
15. mars 2007 klukkan 15:18
Já, alltaf gaman að sjá fólk sem er skylt mér í karllegginn. Mér finnst hann vera dularfullur, og endar áreiðanlega í frönskum sjómönnum, enda hefur mér sýnst að allir afkomendur Halldórs Halldórssonar (og jafnvel líka föður hans og föðurafa) sem ég þekki hafi eitthvað suðrænt við sig. Páll, sonur Halldórs Halldórssonar Guðmundssonar var ættfaðir Dungal-ættarinnar.
Ég gaspraði mikið að ofan um skyldleikagiftingar í embættismannaættinni sem móðir mín er komin af. Að sama skapi virðast skyldleikagiftingar hafa verið sjaldgæfar í föðurættinni, en þar virðast engin skyldmenni hafa gifst. Einnig virðast foreldrar mínir vera nær alveg óskyld með öllu, jafnvel þótt faðir minn sé ættaður af öllu Vestur- og Norðurlandi.
Emibættismannaættin er ekki ætt sem er einhvers staðar frá af landinu. Þetta er fólk sem virðist hvergi hafa ílengst, nema kannski helst á Suðurlandi. Það fór á milli landshluta ef þar var embætti að fá.
16. mars 2007 klukkan 9:54
Páll Halldórsson var langafi minn
16. mars 2007 klukkan 10:47
Jújú, kæra frænka. :>
16. mars 2007 klukkan 12:04
Ég veit! Stofnum fjórmenningaklíku!
16. mars 2007 klukkan 23:24
ekki versta hugmynd sem ég hef heyrt í dag:)
18. mars 2007 klukkan 11:14
Við erum nú bara sjömenningar samkvæmt Íslendingabók. Skoðun mína á hvort hún er rétt eða ekki ætla ég ekki að viðra hér.
Skildleiki okkar samkvæmt bókinni góðu fellur einnig inn í gullnu regluna um að allir íslendingar séu skildir í 7 ættlið. Sem vekur aftur spurningar um nýbúana. Eru þeir þá ekki alvöru íslendingar ? hmmm…. ?!