Brjálaður Anarkisti

Ég er núna að leita dauðaleit að eintaki mínu af bókinni Fuglar Íslands og Evrópu, því ég verð að finna hvaða fugl það var sem ég sá á ferð minni upp með Elliðaánum á laugardag. Þetta var alsvartur sundfugl eða vaðfugl sem leit út eins og mitt á milli himbrima og hegra. Hann hafði mjög sérkennilegt látbragð og var alltaf að setja gogginn niður í bringu og snúa hausnum, sem var þá eins og tár að lögun. Þess í milli teygði hann hálsinn langt út. Goggurinn var mjög þunnur, en mig minnir að hann hafi breikkað út neðst. Ég er ekki viss um að hann hafi verið algerlega svartur, en hann var að minnsta kosti mikið svartari en himbrimi. Hann var líka mikið þokkafyllri í lögun og látbragði en himbrimi; grennri og ávalari, en þó ekki jafn mjór eða jafn langur og hegri. Hann stóð mjög rólegur á bakka lítils lóns eða hóps rétt fyrir ofan litla fossinn sem er rétt hjá þar sem Bústaðavegurinn hittir Breiðholtsbrautina.

Ég hef verið síhjólandi um helgina. Á laugardag hjólaði ég upp að Elliðavatni og í kringum það (rangsælis) og þaðan í bæinn gegnum Árbæinn og kom við í vínbúðinni Heiðrúnu. Þegar ég var kominn aftur í bæinn var ég kominn í ástand sem mætti líkja við leiðslu - ég og hjólið vorum eitt og ég var óþreytandi að fara hvert sem er, hraðar en ég hef áður getað.

Ég söng hástöfum með mp3 spilaranum mínum stóran hluta leiðarinnar.

Ég fékk peninga úr ekki svo óvæntri átt og gat því endurnýjað hjólakostinn. Ég fór í Örninn, en þaðan fékk ég mín fjögur fyrstu hjól, meðan sú verslun var enn á Spítalastíg 8. Þegar ég loks fékk afgreiðslu (en verslunin var orðin vel full fyrir klukkan tólf) snerist afgreiðslumaðurinn í kring um mig og kom með alls kyns góðgæti aftan úr lager sem var ekki til sýnis í versluninni. Á meðan voru brettin fest á Trek 4300 hjólið sem ég keypti, sjá mynd hér að ofan. Ég keypti líka nýjar hjólabuxur, bæði stuttbuxur og síðbuxur, hanska og hjálm, en hann er þægilegasti hjólahjálmur sem ég hef átt til þessa, og mun ég því sennilega nota hjálm meira héreftir.

Síðan fórum við valkyrjan út að hjóla, en hún fékk sitt fyrsta 26-tommu hjól í afmælisgjöf fyrir 8 vikum en hafði ekki prófað það fyrr en í dag.

Við vorum bæði gagntekin af því hversu góð hjólin voru. Þau eru áþekk hvað stell varðar, en ég held að minn búnaður sé betri.

Allt í einu sé ég eftir því að hafa ekki keypt miða á árshátíð Háskólans í kvöld.