Brjálaður Anarkisti

Þótt ég sé fæddur árið 1963 er svo undarlegt með mig að ég hef elskað áratuginn sem ég fæddist í allar götur síðan.

Ég elska allt frá sjöunda áratugnum, “sixtís”, en þó umfram allt tónlistina. Alveg frá upphafi áratugarins og til loka hans.

Ég lærði að lesa þegar ég var fjögurra ára og varð strax mjög hraðlæs og las bækur, tímarit og blöð af mikilli áfergju. Sjónvarp var til á mínu heimili frá því áður en Ríkisútvarpið hóf sjónvarpsútsendingar. Móðir mín hlustaði oft á útvarp á daginn, á kvöldin var horft á sjónvarp, leiknar hljómplötur eða pabbi spilaði á trompetinn sinn. Yfirleitt var amk tvennt af þessu í gangi.

Einhvern veginn síaðist andblær sjöunda áratugarins inn í barnssálina og hefur æ síðan búið þar eins og minning um glataða paradís.

Núna eru bandarískir íhaldsmenn að segja að Bush sé ekki sannur íhaldsmaður og að hann hafi svikið íhaldsstefnuna og það sé ekki hægt að taka gerðir hans sem dæmi um hina sönnu íhaldsstefnu. Er þetta ekki farið að hljóma kunnuglega?

Ég tek eftir því að ungt fólk  gagnrýnir vinstriflokkana helst fyrir forræðishyggju. Ég skil það vel. Flestir stjórnmálamenn virðast vera illa haldnir forræðishyggju, en sá er munurinn að vinstrimenn eru haldnir forræðishyggju þegar líf og heilsa borgaranna er í húfi, en hægrimenn þegar gróði þeirra og einkavina þeirra er í húfi.

Ég tel að harmleikur vinstrimanna felist helst í því að helstu útfærslur sósíalisma á síðustu öld skorti góðar stjórnskipunarréttarfarslegar undirstöður. Stjórnarskrár kommúnistaríkja voru gallaðar, þar sem þær leituðust ekki við að tryggja rétt borgaranna með því að takmarka völd ríkisvaldsins. Það var hins vegar ekki innbyggður galli í sósíalismanum í sjálfu sér, heldur bara handvömm og fáfræði höfunda viðkomandi stjórnarskráa.

Ég sé enga afsökun fyrir trúfrelsi. Ég skil ekki hvers vegna heróín og kókaín er bannað á meðan trúboð er leyft. Hins vegar er trú ágætis skemmtiefni á köflum, eins og þessi saga sem er víst eftir Emo Phillips:

I was walking across a bridge one day, and I saw a man standing on the edge, about to jump off. So I ran over and said ‘Stop! don’t do it!’ ‘Why shouldn’t I?’ he said. I said, ‘Well, there’s so much to live for!’ He said, ‘Like what?’ I said, ‘Well…are you religious or atheist?’ He said, ‘Religious.’ I said, ‘Me too! Are you Christian or Buddhist?’ He said, ‘Christian.’ I said, ‘Me too! Are you Catholic or Protestant?’ He said, ‘Protestant.’ I said, ‘Me too! Are you Episcopalian or Baptist?’ He said, ‘Baptist!’ I said, ‘Wow! Me too! Are you Baptist church of god or Baptist church of the lord?’ He said, ‘Baptist church of god!’ I said, ‘Me too! Are you original Baptist church of god, or are you reformed Baptist church of god?’ He said, ‘Reformed Baptist church of god!’ I said, ‘Me too! Are you reformed Baptist church of god, reformation of 1879, or reformed Baptist church of god, reformation of 1915?’ He said, ‘Reformed Baptist church of god, reformation of 1915!’ I said, ‘Die, heretic scum,’ and pushed him off.

Samfylkingin biðlar til kjósenda Vinstri Grænna, Sjálfstæðisflokkurinn biðlar til kjósenda Samfylkingarinnar … er þá ekki næst að Vinstri-Grænir biðli til kjósenda Sjálfstæðisflokksins, svona til að ljúka hringnum?

Vorið er svo þykkt í loftinu að maður finnur líkamlega nærveru þess.

Þegar ég var tíu eða ellefu ára í Álftamýrarskóla skrifaði ég ritgerð um heiminn og hvernig hann yrði þegar ég væri orðinn stór. Þetta hefur verið á því herrans ári 1974. Ég hafði alltaf á tilfinningunni að kennarinn skildi ekki ritgerðina, að minnsta kosti fékk ég engar athugasemdir eða spurningar, bara einkunn án útskýringa.

Í ritgerðinni hélt ég því fram að helsta raforkulind okkar yrði vetnissamruni og að segulhraðlestir yrðu á hverju strái. Þetta yrði bara á næstu 20 árum. Ég sé nú að ég hef verið pínulítið of bjartsýnn þá. En bara pínulítið.

Það er kominn tími til að Íslendingar smíði sínar eigin segulhraðlestir.

Til hvers þarf flugvöll í Reykjavík þegar maður kemst til Keflavíkur á 15 mínútum? Með segulhraðlest frá Mjódd til Keflavíkur verður fljótlegra að fara frá Breiðholti til Keflavíkur en frá Breiðholti niður í Vatnsmýri.

Og þetta er ekkert mál. Þetta borgar sig margfalt upp á örfáum árum. Svo þurfum við segulhraðlest kringum landið og eina í beina línu til Akureyrar. Þetta er í rauninni nauðsynlegt til að samgöngur leggist ekki af eftir nokkur ár þegar olían klárast.

Stundum langar mann til að blogga en hefur svo lítið að segja. Hér hef ég því safnað saman nokkrum slíkum smáatriðum.

“Þú ert mjög vond kú” sagði einhver persóna í barnatímanum rétt áðan. Með svona fyrirmyndir, er nokkur von að börnin læri nokkurn tímann Gullaldar-Íslenzku?

–
Munnhörpurnar sem fást á 200 krónur í Tiger eru ekki peninganna virði. Þær eru einfaldlega rangar. Ekki bara falskar, heldur rangar. Betri eru 100 króna munnhörpurnar í IKEA, eða 650 króna Hohner Silver Star sem fást víða í hljóðfæraverslunum. Þær eru hvorar tveggja vel peninganna virði.

–

Er það ímyndun í mér að allt það fólk sem hefur skipt máli á Gettu Betur eru kommúnistar, eða allavega skrifa á Múrinn? Ég spái sigri Ásgeirs Berg í kvöld. Ég kynntist honum lítillega á IRC fyrir fjöldamörgum árum, þó ekki svo vel að ég vissi hvað hann héti þá eða hversu gamall hann væri. Síðan hef ég komist að því að hann og dóttir mín eiga fjölmarga sameiginlega vini.

Ef þú ert í útlöndum og getur ekki stillt á RÚV þá smelltu bara á þennan link klukkan 20:00 GMT

–